Björn Leví Gunnars­son, þing­maður Pírata var einn af þeim sem meintir hryðju­verka­menn hafi haft á lista um aðila sem átti að drepa. Hann segir að það hafi komið til um­ræðu að auka öryggis­gæslu á Al­þingi, en það skiptir máli hvernig það er gert. Hærri girðingar og aukin vopna­væðing er ekki lausnin að hans sögn.

„Það var hringt í mig á þriðju­daginn í síðustu viku og ég var boðaður í skýrslu­töku á mið­viku­daginn, en ég skaust þarna seint á þriðju­deginum í skýrslu­töku. Þar var mér tjáð og sýnd sam­skipti milli tveggja aðila, á­samt mynd sem var af ein­hverjum allt öðrum aðila, að í sam­talinu væru upp­lýsingar um að þeir hygðust drepa mig, Smára og Helga Hrafn ein­hvern tímann,“ segir Björn Leví.

„Maður hefur alveg séð á­líka á sam­fé­lags­miðlum, en þá er það meira í flimtingum ein­hvern veginn, en þegar það tengist aðilum sem eru að sanka að sér vopnun, þá er það tví­mæla­laust á allt öður le­veli,“ segir Björn, en bæti við að það sé langt á milli þess að segja og gera.

Hann telur að aukin vopn­væðing og harðræði sé ekki lausnin, upp­runi vanda­málsins sé fé­lags-og heil­brigðis­vanda­mál.

Hægt er að sjá við­talið við Björn í heild sinni hér.