Þau Asa Berglind og sambýlismaður hennar Tómas Jónsson, tónlistarmaður höfðu ákveðið að gifta sig nú í sumar og halda þau enn í vonina þrátt fyrir að fjölmörg pör hafi frestað stóra deginum. Þau ætla aðeins að sjá hvernig mál þróast og hafa sínar ástæður fyrir því.

„Rétt fyrir jól greindist pabbi minn með alvarlegt krabbamein, aðeins 57 ára gamall. Það ýtti við okkur, því lífið er jú bara akkúrat núna. Þar að auki get ég ekki hugsað mér að gifta mig án þess að hafa pabba minn með og eins og þetta leit út til að byrja með þá vorum við ekki sérlega bjartsýn. En það er gaman að segja frá því að við fengum stórkostlegar fréttir í lok apríl, þegar niðurstöður úr rannsóknum sýndu að hann er að svara lyfjameðferð mjög vel, svo nú horfum við bjartari augum fram á veginn,“ segir Ása einlæg.

En það er skammt stórra högga á milli og í lok mars missti Ása vinnuna.

„Það má segja að ég og maður minn höfum strax fundið fyrir efnahagslegum áhrifum COVID. Hann er sjálfstætt starfandi tónlistarmaður og missti öll sín verkefni strax í lok febrúar og sér ekki fyrir endann á því. Ég var að vinna á fallegum veitingastað í Þorlákshöfn við markaðsmál og tónleikahald en var sagt upp í lok mars. Það er alveg sérstök tilfinning að missa vinnuna og vondur staður að vera á sérstaklega þegar ástandið er eins og það er .“


Umboðsmennska og tónleikar


Ása stundar mastersnám í menningarstjórnun við Háskólann á Bifröst en áður hafði hún lokið tónlistarnámi frá Listaháskólanum og hefur mest megnis starfað á því sviði. „Ég hef frá árinu 2012 verið umboðsmaður og tónleikahaldari og unnið með frábæru fólki við að setja upp metnaðarfulla viðburði sem er með því skemmtilegra sem ég geri.“

„Það er alveg sérstök tilfinning að missa vinnuna og vondur staður að vera á sérstaklega þegar ástandið er eins og það er .“

En að brúðkaupsskipulaginu, hugmyndina að þjónustunni segir Ása hafa komið upp þegar þau hjónaleysi ákváðu að gifta sig .

„Ég fór þá á internetið í leit að upplýsingum. Ég var að vonast til að finna síðu sem myndi leiðbeina og veita mér innblástur, því brúðkaup er alveg sérstakur viðburður.

Okkur langar að fagna þessum degi með stórum hópi vina og ættingja og það er í virkilega mörg horn að líta í undirbúningnum. Ég fann margar erlendar síður með skemmtilegum sögum, praktískum upplýsingum, gullfallegum myndum sem veittu mér mikinn innblástur og hugsaði oft, „Af hverju í ósköpunum er enginn búinn að gera þetta á Íslandi?“

Svo bara kviknaði á perunni - auðvitað græja ég þetta bara og býð þá að auki upp á eigin þjónustu. Þegar ég svo missti vinnuna myndaðist tími og rými til að hrinda þessu í framkvæmd.“

Vefurinn tofrandibrudkaup.is er nú kominn í loftið en þar er að finna pratískar og skemmtilegar upplýsingar sem tengjast brúðkaupum og undirbúningnum öllum bæði í bloggi og hlaðvarpi.

„Í hlaðvarpið fæ ég til mín fagaðila sem munu fræða, gefa góð ráð og segja sögur úr brúðkaupsbransanum og á blogginu verða ýmsar praktískar upplýsingar og sögur frá íslenskum brúðhjónum svo eitthvað sé nefnt.“

„Svo bara kviknaði á perunni - auðvitað græja ég þetta bara og býð þá að auki upp á eigin þjónustu."

Ása ætlar jafnframt að gefa þjónustuaðilum; ljósmyndurum, veisluþjónustum, verslunum, tónlistarfólki og fleirum kost á að koma sér á framfæri.

„Síðast en ekki síst er ég með ólíkar þjónustuleiðir fyrir tilvonandi brúðhjón, allt frá litlum skipulagspakka fyrir þau sem vilja gera allt sjálf og upp í það að sjá alfarið um skipulag og framkvæmd brúðkaupsins. Þar að auki býð ég upp á að útbúa heimasíður sem margir nota orðið í staðinn fyrir eða meðfram boðskortum.“


Mikilvægt að halda geðheilsunni

Ása viðurkennir að það sé sérstök tilfinning að opna viðburðaþjónustu í miðju samkomubanni.

„Fyrir mig persónulega gefur það mér tilgang, jafnvel þó ég viti að það muni örugglega líða svolítill tími þar til ég fer að fá tekjur úr þessu verkefni. Auðvitað er þetta gríðarlega erfiður tími fyrir fyrirtæki sem veita þjónustu á viðburðum en á sama tíma má vonandi reikna með því að það verði tvöfalt meira að gera næsta sumar. Eins er rétt að hafa í huga að þau sem ætla að gifta sig næsta sumar eru farin eða fara mjög fljótlega af stað í að undirbúa sig og bóka hitt og þetta. Svo það er von.“

„Fyrir mig persónulega gefur það mér tilgang, jafnvel þó ég viti að það muni örugglega líða svolítill tími þar til ég fer að fá tekjur úr þessu verkefni."

Aðspurð um algengustu mistökin sem brúðhjón geri segir Ása það vera að ætla sér að gera allt sjálf.

„Það er virkilega mikilvægt að halda geðheilsunni og vera ekki farin yfir um af stressi þegar dagurinn kemur loks svo það er nauðsynlegt að fá aðstoð. Að virkja fjölskyldu og vini og ráða inn fagaðila í ólík verkefni og gæta þess að úthluta verkefnum á skipulagðan hátt.”

10 ráð frá Ásu fyrir verðandi brúðhjón

1.Það er æskilegt (ekki lífsnauðsynlegt þó) að gefa sér að minnsta kosti 6-12 mánuði í undirbúningstíma.

2. Búið til kostnaðaráætlun og fylgist með því sem þið eruð að eyða. Þetta safnast fljótt saman.

3. Brúðarkjóla og sérhannaðan fatnað þarf oft að panta með að minnsta kosti 6 mánaða fyrirvara, stundum fyrr, til að vera 100% örugg um að fá það sem ykkur langar mest í.

4. Nýtið ykkur íslenska þjónustuaðila. Oft er ekkert mikið ódýrara að panta á erlendum síðum þegar öll gjöld eru komin ofan á.

5. Kaupið notað eins og hægt er.

6. Matur er manns gaman. Matur getur verið allskonar og engin ein leið er rétt, bara hafa nóg af honum og passa að það séu góðir valmöguleikar fyrir vegan fólk.

7. Fáið aðstoð! Og ekki gleyma að undirbúa niðurtekt í veislusal ef hún er á ykkar vegum.

8. Munið að njóta ferðalagsins. Undirbúningurinn er líka skemmtilegt ferli og stór hluti af þessum tímamótum, verið saman í því ferli og hafið gaman að því.

9. Bókið tíma fyrir ykkur saman í spa eða eitthvað dekur í vikunni fyrir brúðkaupið. Andið, njótið og leyfið ykkur að hlakka til.

10. Sama hvernig allt fer þá verður þetta töfrandi og ógleymanlegur brúðkaupsdagur, treystið því og þá þarf enginn að fara yfir um.