Atvinnuleysi í júní var 5,6 prósent samkvæmt árstíðaleiðréttum tölum úr vinnumarkaðsrannsókn Hagstofu Íslands. Árstíðaleiðrétt atvinnuþátttaka var 79,2 prósent og árstíðaleiðrétt hlutfall starfandi var 74,5 prósent.

Samanburður við maí sýnir að árstíðaleiðrétt atvinnuþátttaka, hlutfall starfandi og atvinnuleysi hélst nokkuð stöðugt á milli mánaða. Árstíðaleiðrétt atvinnuþátttaka og hlutfall starfandi jókst um 0,7 prósentustig og atvinnuleysi dróst saman um 0,1 prósentustig.

Talið er að 21.600 einstaklingar hafi haft óuppfyllta þörf fyrir atvinnu (slaki) í júní, sem jafngildir 9,8 prósentum af vinnuafli og hugsanlegu vinnuafli. Af þeim voru 47,5 prósent atvinnulaus, 14 prósent tilbúnin að vinna en ekki að leita, 7,6 prósent í atvinnuleit en ekki tilbúnin að vinna og 30,8 prósent vinnulitlir, það er starfandi í hlutastarfi og vilja vinna meira. Slaki á vinnumarkaði var nánast sá sami nú í júní og í júní í fyrra þegar hann mældist tíu prósent.

Niðurstöður vinnumarkaðsrannsóknar fyrir júní ná til fimm vikna, frá 31. maí til og með 4. júlí. Í úrtak völdust af handahófi 1.898 einstaklingar á aldrinum 16 til 74 ára með lögheimili á Íslandi. Þegar frá eru taldir þeir sem voru látnir eða búsettir erlendis var nettóúrtakið 1.867 einstaklingar. Alls fengust nothæf svör frá 1.182 einstaklingum sem jafngildir 63,3 prósent svarhlutfalli.

Mynd/Hagstofan