Fáir firðir hér á landi geta státað af jafn mörgum tignarlegum fjallstindum og Berufjörður, sem jafnframt er með fall­egri fjörðum á Austurlandi. Einn þeirra stelur athyglinni, en það er Búlandstindur við sunnanverðan fjörðinn. Hann rís 1.069 m beint upp af Svarthamarsvík og hefur ísaldarjökullinn náð að slípa til nánast fullkominn píramída úr hraunlögum, sem aðeins halla nokkrar gráður.

Þarna minnir Búlandstindur óneitanlega á hæsta og elsta Giza-píramídann í Egyptalandi, sem kenndur er við Keops og er 147 m hár og 230 m á breidd. Vestan Búlandstinds eru síðan tveir aðrir tindar, Sauðdalstindur og Dys, sem gætu allt eins verið píramídabræður hans á Giza, sem kenndir eru við Kefrens og Mýkeríonos. Píramídaþrenningin á Giza er eitt af sjö undrum veraldar og telst til mestu bygginga heimsins.

Á leiðinni upp Búlandstind opnast voldugt skarð, þar sem Berufjörður og fjöllin norðan hans blasa við.
Mynd/TG

Þeir eru tæplega 5.000 ára gamlir sem gerir þá að ungabörnum í samanburði við hraunlögin í Búlandstindi sem talin eru í kringum 10 milljón ára gömul. Í þeim er víða að finna geislasteina (zeolíta), sem eru steindir sem hafa orðið til í holum í berginu og sjást best í gömlum námum við Teigarhorn, steinsnar frá Búlandstindi.

Það er frábær skemmtun að ganga á Búlandstind en nokkuð krefjandi. Tilvalið er að hefja gönguna í Svarthamarsvík, skammt frá Djúpavogi, og er Búlandsá fylgt inn Búlandsdal þar til komið er að suðurhlíðum fjallsins. Margir kjósa þó að aka jeppaveg inn eftir dalnum, sem styttir gönguna um rúma 2 km.

Komist er yfir Búlandsá á stíflubrú og síðan er haldið upp grasi grónar hlíðar tindsins. Leiðin er stikuð og liggur meðfram skarði vestan megin hátindsins. Stöllóttar brekkurnar eru skáskornar uns komið er upp í klettaskarð þar sem skyndilega sést ofan í Berufjörð og stórkostlegt tindasafnið norðan hans. Síðasti hluti leiðarinnar liggur í gegnum klettabelti uns komið er upp að nokkurra metra klettavegg efst.

Þar er gestabók, en fyrir þá sem ekki eru lofthræddir má príla upp vegginn og horfa beint niður 1.000 metra þverhnípi ofan í Berufjörð. Útsýnið af þessu áttunda undri veraldar er frábært og sér yfir stóran hluta Austurlands og inn á hálendi þess.