Stjórnstöð Landhelgisgæslunnar barst neyðarkall frá rækjutogaranum Sóleyju Sigurjóns GK-200 klukkan skömmu upp úr klukkan 21 í gærkvöldi vegna elds sem var laus í vélarrúmi skipsins. Átta voru um borð og skipið statt um 90 sjómílur norður af landinu.

TF-LIF, þyrla Landhelgisgæslunnar, var þegar í stað kölluð út sem og varðskipið Týr, sem statt var við Húsavík. Þá var björgunarskipið Sigurvin, á vegum Slysavarnafélagsins Landsbjargar, kallað út frá Siglufirði með tvo slökkviliðsmenn um borð. Einnig var togarinn Múlaberg sem var í grenndinni beðinn um að halda á vettvang.

Áhöfnin á Sóleyju Sigurjóns ræsti slökkvikerfi í vélarrúmi skipsins en skipverjarnir átta voru fljótlega komnir í björgunargalla.

Laust fyrir miðnætti kom togarinn Múlaberg og TF-LIF, þyrla Landhelgisgæslunnar, á vettvang. Línu var komið á milli skipanna og dró Múlabergið Sóleyju Sigurjóns í togi til lands. Ákveðið var að fækka í áhöfn skipsins og voru tveir skipverjar hífðir um borð í TF-LIF sem hélt til Akureyrar. Varðskipið Týr hélt á móti skipunum og könnuðu varðskipsmenn ástandið um borð í rækjutogaranum. Björgunarskipinu Sigurvin var snúið við.