Aranza Maria Ochoa Lopez, átta ára stúlka, fannst heil á húfi á dögunum, rúmum fjórum árum eftir að hún var numin á brott.
Móðir stúlkunnar nam hana á brott þegar hún fékk að hitta hana undir eftirliti í verslunarmiðstöð í borginni Vancouver í Washington-ríki dag einn í október 2018. Móðirin var handtekin í Mexíkó árið 2019 en Aranza fannst hins vegar hvergi.
Bandaríska alríkislögreglan, FBI, tilkynnti á miðvikudag að Aranza hefði fundist heil á húfi í Mexíkó. Fulltrúar FBI hafa nú flutt stúlkuna til Bandaríkjanna en alríkislögreglan gefur ekki upp hvar hún er niðurkomin.
Lopez hafði verið á fósturheimili frá árinu 2017 þegar hún var numin á brott rúmu ári síðar. Móðir hennar hafði verið sökum um ofbeldi gegn henni og var svipt forræði af þeim sökum.
Í fréttum bandarískra fjölmiðla kemur fram að móðirin hafi beðið um að fara með stúlkuna á salerni verslunarmiðstöðvarinnar. Tókst henni að koma stúlkunni út og í bifreið sem hafði verið stolið áður en hún fór með hana til Mexíkó. Móðirin var sem fyrr segir handtekin árið 2019 og dæmd í 20 mánaða fangelsi fyrir ránið.
