Áslaug Hulda Jónsdóttir, formaður bæjarráðs í Garðabæ, hefur ákveðið að gefa kost á sér sem ritari Sjálfstæðisflokksins. Þetta staðfestir hún í tilkynningu til fjölmiðla.

Staða ritara í forystusveit Sjálfstæðisflokksins er laus eftir að Ás­laug Arna Sigur­björns­dóttir tók við embætti dómsmálaráðherra en samkvæmt reglum flokksins getur ritari ekki setið sem ráðherra. Verður því kosið um nýjan ritara á flokksráðsfundi Sjálfstæðisflokksins sem hefur verið boðaður þann 14. september næstkomandi.

„Ég hef lengi verið þeirrar skoðunar að það sé flokknum nauðsynlegt að í forystu hans sé fulltrúi sveitarstjórnarstigsins. Stórir og mikilvægir málaflokkar eru undir og þá hafa einnig margir af stærstu sigrum flokksins unnist í einstökum sveitarfélögum. Þar liggur okkar sterka grasrót og að henni þarf að hlúa vel,” segir Áslaug Hulda.

Hún hefur skipað 1. sætið á lista Sjálfstæðisflokksins í Garðabæ í síðustu þremur sveitastjórnarkosningum. Í síðustu kosningum fékk flokkurinn 62 prósenta fylgi og átta bæjarfulltrúa af ellefu í bæjarstjórn.

„Það var um leið besta niðurstaða Sjálfstæðisflokksins á landinu. Slíkur árangur næst ekki af sjálfu sér í sívaxandi bæjarfélagi og ég tel mig hafa margt fram að færa í forystu Sjálfstæðisflokksins,“ segir Áslaug Hulda.

Áslaug Hulda býr að áralangri reynslu úr starfi Sjálfstæðisflokksins og vettvangi sveitarstjórnar sem formaður bæjarráðs, forseti bæjarstjórnar, bæjarfulltrúi, aðstoðarmaður ráðherra, kosningastjóri í sveitarstjórnar- og alþingiskosningum auk annarra trúnaðarstarfa.

„Ég trúi að flokkurinn eigi mikið inni hjá kjósendum um allt land. Það er hlutverk kraftmikillar forystu flokksins að virkja almennilega sem flesta flokksmenn til að uppskera sem mest,” segir Áslaug Hulda.

Jón Gunnarsson, þingmaður Sjálfstæðisflokksins og fyrrverandi samgönguráðherra hefur einnig gefið kost á sér. Eyþór Arnalds, Hildur Björnsdóttir, Vala Pálsdóttir og Kristján Þór Magnússon hafa einnig verið orðuð við hlutverk ritara en hafa þó ekki gefið formlega kost á sér.