Askja frumsýndi í Grósku á fimmtudaginn nýjan bíl sem fer brátt í sölu hérlendis en það er næsta kynslóð smart. Á Íslandi sem annars staðar í Evrópu mun forsala á nýja smart #1 rafbílnum hefjast í lok ársins en fyrstu afhendingar á bílnum verða um mitt næsta ár. Fyrstu bílarnir verða í svokallaðri Launch Edition-útgáfu sem er með nánast samskonar útliti og Concept #1 tilraunabíllinn sem frumsýndur var í Munchen í fyrra.

Frá kynningu bílsins í Grósku, húsnæði Háskóla Íslands.

Bíllinn kemur á nýjum undirvagni frá Geely í Kína sem kallast SEA og verður undir fleiri smartbílum í framtíðinni. Samkvæmt talsmönnum smart munu bílar merkisins bera númer líkt og #1 eftir þeirri röð sem þeir koma í en ekki eftir stærð. Smart #1 mun koma með 66 kWst rafhlöðu sem hægt er að hlaða með allt að 150 kW hleðslustöð í 80% hleðslu á undir 30 mínútum. Með 22 kW heimahleðslustöð mun taka um þrjá tíma að komast í 80% hleðslu. Bíllinn verður afturdrifinn og mun skila 268 hestöflum og 343 Nm togi. Aðrar tölur sem við vitum um bílinn eru að hann verður 1.820 kg að þyngd og hámarkshraðinn 180 km á klst.

Bíllinn er 4.270 mm að lengd og með 2.750 mm hjólhaf, sem gerir hann að stærsta smart bílnum hingað til, og því mun merkið ekki einungis halda sig við smábíla eins og áður. Að sögn talsmanna smart er bíllinn mjög rúmgóður og er með svipað rými innandyra og E-lína MercedesBenz. Plássið aftur í verður 411 lítrar en einnig er 15 lítra hólf undir húddinu. Um tæknilega fullkominn bíl er að ræða í smart #1. Í miðju mælaborðinu er 12,8 tommu upplýsingaskjár en fyrir framan ökumann er 9,2 tommu skjár ásamt 10 tommu framrúðuskjá. Bíllinn mun koma með Level 2 sjálfkeyrslubúnaði sem gerir honum kleyft að taka af stað og stoppa sjálfum í þungri umferð, halda sig innan akreinar, aka sjálfur í stæði og með sjálfvirkan háan ljósgeisla. Auk þess verður í honum ýmiss konar afþreyingarbúnaður þótt Evrópuútgáfan verði að öllum líkindum ekki með karaoke-kerfi eins og sú kínverska.