Miðstjórn ASÍ sendi frá sér ályktun um efnahags- og atvinnumál eftir miðstjórnarfund sem lauk klukkan hálf fjögur í dag.

Stjórnin lýsir yfir þungum áhyggjum af stöðu launafólks og atvinnuleitenda með haustinu í ljósi atvinnuástandsins.

Í ályktuninni segir að stuðningi stjórnvalda hafi verið beint til fyrirtækja fremur en fólks. Mikilvægasta aðgerðin til að milda áhrifin fyrir einstaklinga og heimili, og þannig fyrir efnahagslífið, er að hækka atvinnuleysisbætur og lengja tímabil tekjutengingar. Miðstjórn ASÍ fer fram á að stjórnvöld taki af skarið um úrbætur þegar í stað.

Drífa Snædal, forseti ASÍ segir í samtali við Fréttablaðið að núna sé stóra verkefnið að klára það sem úti stendur í kjarasamningunum frá því síðasta vor.

„Þá verður einnig að tryggja framfærslu og húsnæðisöruggi landsmanna inn í haustið."

Hafna öllum tillögum sem lúta að almenningi

Miðstjórn ASÍ hafnar öllum tillögum sem lúta að því að senda reikninginn vegna björgunaraðgerða stjórnvalda í tengslum við Covid-kreppuna til almennings á næstu árum.

Þá telja þau enga efnahagslega nauðsyn að skera niður í heilbrigðis-, mennta- og velferðarkerfinu selja opinberar eigur, auka gjaldtöku eða ráðast í einkavæðingu eða einkarekstur.

Slíkar aðgerðir væru allar til þess fallnar að dýpka kreppuna og auka á afkomu- og skuldavanda einstaklinga og heimila.

Forsendur lífskjarasamninganna brostnar

Miðstjórn ASÍ telur að stjórnvöld hafa ekki staðið við sinn hluta lífskjarasamninganna, meðal annars því er lýtur að húsnæðismálum, verðtryggingu, mansali og félagslegum undirboðum og sektarákvæðum vegna kjarasamningsbrota.

Forsendur lífskjarasamninganna eru samkvæmt orðanna hljóðan brostnar og farið er fram á viðræður um samningana og þau loforð sem þar eru gefin, segir í ályktuninni.