Arnar Þór Jónsson, verðandi varaþingmaður Sjálfstæðisflokksins í Suðvesturkjördæmi hefur ákveðið að láta af embætti héraðsdómara. Hann tilkynnir þetta í Facebook færslu.
Arnar Þór var í fimmta sæti á lista Sjálfstæðisflokksins í kjördæminu en flokkurinn náði fjórum mönnum inn á þing þar. Þetta þýðir að Arnar Þór verður fyrsti varaþingmaður í kjördæmi Bjarna Benediktssonar, formanns flokksins.
Arnar segist nú standa á krossgötum í kjölfar Alþingiskosninga. Hann hafi legið undir feldi síðustu daga.
„Dómaraembættið hefur hentað mér vel að sumu leyti, en umhverfið hefur þrengt að hugsun minni og oft hefur mér liðið eins og fugli í búri,“ skrifar Arnar Þór.
Hann segir að það besta við að hafa kúplað sig úr hlutverki dómara undanfarna mánuði sé að honum hafi aftur liðið eins og frjálsum manni með sjálfstæða rödd.
„Ég hef verið frelsinu feginn og hjartað segir að ég eigi að velja leið frelsis. Á þessum forsendum hef ég tekið ákvörðun um að stíga út fyrir skorður dómskerfisins og nýta bæði meðbyr og mótbyr til að taka flugið á nýjum vettvangi. Ég mun njóta þess að tala, skrifa og vinna að mínum hugðarefnum laus við ytri fjötra með bjartsýni og trú að leiðarljósi.“
