Ármann Kr. Ólafsson, bæjarstjóri Kópavogs, mun ekki bjóða sig fram í sveitarstjórnarkosningunum í vor. Þetta hefur Fréttablaðið eftir öruggum heimildum.

Ármann hefur verið bæjarstjóri frá árinu 2012, fyrst í meirihlutasamstarfi Sjálfstæðisflokks með Framsóknarflokki og Y-lista 2012-2014, með Bjartri framtíð 2014-2018 og með Framsóknarflokki frá 2018.

Heimildir Fréttablaðsins herma að unnið sé að því innan hluta Sjálfstæðisflokksins í bænum að finna eftirmann fyrir Ármann. Hafa nöfn þeirra Jón Ólafs Halldórssonar, fyrrverandi forstjóra Olís, og Sveins Gíslasonar, formanns Breiðabliks, verið nefnd.

Er búist við tilkynningu frá Ármanni í dag eða á morgun.

Uppfært 12:45.

Ármann sendi frá sér tilkynningu.

„Síðustu 25 ár hef ég helgað mig bæjarmálunum í Kópavogi. Ég var kjörinn bæjarfulltrúi árið 1998 og hef verið bæjarstjóri frá árinu 2012 en ég tel nú tímabært að stíga til hliðar og að annar taki við keflinu,“ segir hann.

„Á þeim tíma sem ég hef starfað í bæjarmálunum hefur Kópavogur tekið miklum breytingum þar sem fjöldi íbúa í bænum hefur tvöfaldast og telur nú um 40.000 manns. Ég er stoltur af því að hafa starfað með Sjálfstæðisflokknum í gegnum þær umbreytingar sem hafa átt sér stað í Kópavogi og hafa leitt flokkinn síðustu 12 ár. Ég hef ávallt haft þá sýn að góður rekstur og ábyrg fjármálastjórn sé undirstaða blómlegs vaxtar bæjarfélagsins og er þeirrar skoðunar að það skýri þá sterku stöðu sem bærinn nýtur núna.“

Segir hann að á þeim tíma sem hann hafi setið í bæjarstjórn Kópavogs hafi hann kynnst og átt samleið með fjölda fólks. „Vil ég nota þetta tækifæri og þakka Kópavogsbúum öllum, öflugu og góðu starfsfólki Kópavogsbæjar, Sjálfstæðisfólki í Kópavogi fyrir þeirra ómetanlega og óeigingjarna starf, pólitískum fulltrúum allra flokka í Kópavogi og á höfuðborgarsvæðinu og þeim fulltrúum fyrirtækja og félagasamtaka sem ég hef kynnst og unnið með í gegnum tíðina.“