Kröpp lægð nálgast nú sunnan úr hafi og vegna hennar mun hvessa verulega síðdegis og snjóa, fyrst syðst á landinu. Það verður svo hríðarveður þar og á Suðausturlandi og Austfjörðum og svo á Norðurlandi í nótt. Vegna þessa eru gular og appelsínugular viðvaranir í gildi í dag og á morgun og ökumenn hvattir til að búa sig undir alvöru vetrarveður. Engin hlýindi né rólegheit er að sjá í veðurkortum næstu daga.

Framan af degi verður hæg suðlæg eða breytileg átt og dálítil él sunnan- og vestanlands, en annars þurrt að kalla. Frost verður 0-8 stig, kaldast í innsveitum fyrir norðan.

Það verður svo vaxandi austan- og síðar norðaustanátt eftir hádegi og þykknar upp. Seinnipartinn verður vindhraði 18-25 m/s suðaustantil og allra syðst með snjókomu eða slyddu. Í kvöld hvessir víðar á landinu með ofankomu, en það verður hægara og úrkomulítið á Vesturlandi. Það hlýnar heldur í veðri í dag og fer að rigna með austurströndinni seint í kvöld.

Appelsínugul viðvörun er í gildi vegna veðurs á Suðausturlandi, en gul viðvörun alls staðar annars staðar, nema á Faxaflóa og höfuðborgarsvæðinu. Gular viðvaranir verða áfram í gildi norðanlands á morgun.

Í fyrramálið verður norðaustanhvassviðri eða stormur, 15-23 m/s, og snjókoma eða éljagangur, hvassast NV-til, en það birtir til syðra. Seinnipartinn verður vindur norðlægari og það lægir smám saman og kólnar.

Veðurhorfur á landinu næstu daga

Á fimmtudag:

Norðan og norðaustan 15-23 m/s framan af degi, en dregur síðan úr vindi, 13-20 m/s síðdegis, hvassast NV til. Snjókoma eða él á N-verðu landinu, en hægara og bjartviðri syðra. Hiti nálægt frostmarki.

Á föstudag:

Norðaustan 10-15 m/s og éljagangur, en austlægari og snjókoma eða slydda syðst. Hiti kringum frostmark.

Á laugardag:

Norðlæg átt og él víða á landinu, en bjartviðri SV-lands. Kólnandi veður.

Á sunnudag:

Vestlægar áttir og víða él, en léttskýjað NA til. Frost 2 til 10 stig.

Á mánudag og þriðjudag:

Líklega breytilegar áttir með éljum á víð og dreif og talsverðu frosti á öllu landinu.

Færð og ástand vega

Vetrarfærð er í öllum landshlutum, víðast hvar hálka eða snjóþekja og sums staðar éljagangur eða snjókoma. Verið er að kanna færð og hreinsa vegi eftir nóttina.

Suðausturland:

Víðast hálka eða snjóþekja en þæfingsfærð í Öræfum. Á köflum talsverð ofankoma.