Sjöunda dauðsfallið hérlendis vegna COVID-19 sjúkdómsins átti sér stað í morgun þegar Annalisa Jansen lést á Landspítalanum. Annalisa var 81 árs þegar hún féll frá. Um tíma leit hún fyrir að hún væri á batavegi. Það breyttist skjótt, sjúkdómurinn ágerðist af miklum þunga og síðustu daga var vitað að brugðið gæti til beggja vona. Annalisa barðist fyrir lífi sínu í þrjár vikur á Landspítalanum,.

Barnabarn Önnulísu, Ragnheiður Ásta Pétursdóttir, tjáir sig um þennan sára missi á samfélagsmiðlum og veitti fjölskyldan Fréttablaðinu leyfi til að greina frá nafni hennar.

„Amma varð tæplega 81 árs. Hún var dagmamma í fjölda ára og endaði svo starfsævi sína á leikskóla, endalaust barngóð og ljúf og góð,“ segir Ragnheiður Ásta um ömmu sína.

Þakklát „englunum“ á deild A6

„Ég var heppin og bjó í næsta húsi við þau afa frá níu ára aldri og naut þess að líta við eftir skóla langt fram á unglingsár, fá kaffitíma, hjálpa til með dagmömmubörnin, spjalla og jafnvel spila smá Nintendo með ömmu. Ég er endalaust þakklát fyrir tímann með henni og fyrir að börnin mín fengið tækifæri til að kynnast yndislegu langömmu sinni,“ segir Ragnheiður Ásta einnig.

Ættingjar Önnulísu þakka heilbrigðisstarfsfólki og beinir Ragnheiður Ásta orðum sínum sérstaklega til „englanna“ á deild A6 sem vöktu yfir ömmu hennar við erfiðar aðstæður.

„Þau sinntu henni af einstakri hlýju, horfðu með henni á snöpp sem við sendum til hennar og hjálpuðu henni að hringja eitt óvænt stórfjölskyldumyndsímtal áður en henni fór að versna. Þau klæddu okkur líka í geimgallana og hughreystu okkur þegar við fengum eitt og eitt að koma inn á deildina til að kveðja í þessum súrrealísku aðstæðum, gerðu sitt allra besta og rúmlega það í glötuðum aðstæðum,“ segir Ragnheiður Ásta. Þá biðlar hún til Íslendinga að taka veiruna alvarlega, hún sé bæði ömurleg og hættuleg.

Leit vel út um tíma

„Haldið ykkur heima og gerið það sem á og þarf að gera til að halda áfram að tækla þennan faraldur! Bústaður, bíltúr, kaffiboð og það allt má bíða. Ég vildi óska að við fjölskyldan gætum hist í dag og knúsast og rifjað upp góðar minningar en það er bara ekki í boði eins og er svo ég knúsa bara krakkana og minnist elsku bestu ömmu hér heima.“

Dóttir Önnulísu, Anna Margrét Ólafsdóttir segir að um tíma hafi litið út fyrir að móðir hennar myndi hafa betur í baráttunni við þennan skelfilega vírus. Um tíma hafi verið rætt um að útskrifa hana.

„Hún fékk hins vegar um helgina hjartaáfall sem var of alvarlegt fyrir veikan líkamann og við tók líknandi meðferð. Um leið og augun fyllast af tárum og ég græt elsku bestu mömmu mína þá er ég gríðarlega þakklát fyrir að hafa haft hana hjá mér í tæp 60 ár. Nú þegar ég sit hér heima með kveikt á kerti fyrir hana og borða kruður að dönskum sið eins og mamma gerði hvern einasta dag birtast alls konar minningabrot úr æsku sem ylja strax og munu gera áfram,“ segir Anna Margrét og bætir við að móðir hennar hafi verið farsæl í starfi bæði sem dagmamma og á leikskólanum Skógarborg þar sem börnin nutu hlýju hennar og kærleika.

„Mamma helgaði líf sitt börnum og vissi fátt betra en að hafa barnahóp í kringum sig. Pabbi var sjómaður og oft lengi í burtu þannig að hún sá að miklu leyti ein um uppeldið á okkur systkinunum og við vorum alltaf í fyrsta sæti hjá henni, þá og alla tíð. [...] Það eru margir sem munu minnast elsku mömmu með mikilli hlýju og kærleika,“ segir Anna Margrét.

Annalisa.jpg

Annalisa Jansen

Kvaddi í gegnum Facebook-spjall

Anna Margrét segir að þessar aðstæður hafi tekið mikið á. „Það er búið að vera erfitt fyrir okkur í fjölskyldunni að þurfa að kveðja mömmu í þessum sturluðu aðstæðum og geta ekki verið hjá henni síðasta spölinn nema stutta stund í einu en starfsfólkið á A6 hefur gert allt sem í þeirra valdi stendur og rúmlega það til að gera þetta bærilegra þrátt fyrir að klárlega hafi það aukið álagið á deildinni sem er gríðarlegt fyrir,“ segir Anna Margrét.

Að hennar sögn fékk fjölskyldan koma í heimsókn á spítalann og var upplifun Önnu Margrétar eins og að hún væri aukaleikari í hryllingsmynd. „Ég vona heitt og innilega að sem fæstir aðstandendur þurfi að kveðja sína nánustu við þessar aðstæður. Við þurftum að sjálfsögðu að vera í fullum hlífðarbúningi eins og starfsfólkið og það var erfiðara og mun óþægilegra en ég hefði nokkurn tímann getað ímyndað mér og mjög streituvaldandi. Ég átta mig nú mun betur á aðstæðunum sem starfsfólkið vinnur við allan sólarhringinn og sendi því mínar hlýjustu kveðjur og þakklæti. Nútímatæknin gerði það að verkum að við náðum að halda fjarsambandi sem ég veit að gladdi mömmu mikið."

Fjölskyldan hafi verið dugleg að senda Önnulísu kveðjur á samfélagsmiðlum og það hafi skipt miklu máli. „Á kvöldin var Snapchat skoðað með henni en við vorum dugleg í fjölskyldunni að senda henni kveðjur á þann hátt. Eitt kvöldið fengum við facebook myndspjall og gátum séð mömmu og spjallað við hana í góða stund. Í gærkvöldi fékk ég að kveðja mömmu í gegnum facebook myndspjall og var það mér ómetanlegt Við fjölskyldan erum starfsfólki A6 gríðarlega þakklát og vitum að elsku mamma var þar í góðum og hlýjum höndum," segir Anna Margrét.