„Þetta er auðvitað bara ein af þessum ankringislegu tilviljunum,“ segir Jón Jónsson, sveitarstjórnarmaður í Stranda­byggð og þjóðfræðingur.

Ekkert einasta Covid-smit er nú í Strandabyggð. Sker sveitarfélagið sig úr frá öllum öðrum sveitarfélögum landsins hvað þetta varðar en veiran hefur farið hratt yfir flest byggð ból á landinu undanfarið.

Nokkur smit hafa áður komið upp í hreppnum að sögn Jóns. Þótt sveitarfélagið sé ekki í hópi hinna fjölmennustu telur Jón það ansi vel sloppið og ankringislegt að íbúarnir séu nú veirufríir.

Ef lesendur kannast ekki við orðið skal upplýst að ankringislegt getur merkt undarlegt eða dularfullt og jafnvel haft fleiri merkingar.

Þó nokkuð er um ferðamenn í héraðinu og sætir fyrir vikið að sögn Jóns enn meiri tíðindum að veiran sé ekki sem stendur að höggva skörð í heilsu íbúanna. Sem dæmi nefnir Jón að Galdrasýningin á Ströndum laði að allan ársins hring.

Jón ber sjálfur ábyrgð á göldrum í héraði sem forstöðumaður safnsins en hann verst svara þegar spurt er hvort það sé töfrum líkast að engin smit séu í sveitarfélaginu.

„Mér finnst að það eigi að fara að tilmælum sóttvarnalæknis og fara varlega,“ segir Jón um framhaldið. „Það er tiltölulega nýbúið að bólusetja börn og vantar seinni sprautuna. Best að sem flestir séu bólusettir áður en við sleppum öllu lausu. Ég vil fara varlega.“

Hátíðin Vetrarsól verður haldin í Strandabyggð um helgina. Jón segir íbúana iðna að finna leiðir til að bregðast við takmörkunum.

„Við förum mikið út að leika okkur og það verður ljósmyndaleikur fyrir krakkana, útibingó, streymi og fleira. Þetta verður hæglætishátíð,“ segir Jón.