Angjelin Sterka­j: „Málið er til­komið af per­sónu­legum á­stæðum“

Angjelin Mark Sterkaj, sem játað hefur að hafa orðið Armando Beqirai að bana í Rauðagerði í febrúar, segist hafa verið einn að verki.

„Mér þykir mjög miður að fjöldi fólks, sem á engan þátt í því sem ég gerði, hafi verið bendlað við málið og jafn­vel þurft að sæta gæslu­varð­haldi, þeirra á meðal Ís­lendingur sem hefur bæði verið opin­ber­lega nafn­greindur og myndir verið birtar af honum með fjöl­miðla­um­fjöllun um málið.“ Þetta segir Angjelin í sam­tali við Frétta­blaðið.

Angjelin hefur setið í gæslu­varð­haldi vegna málsins í tæpar tíu vikur. Alls hafa fjór­tán verið hand­teknir vegna málsins. Af þeim sættu, þegar mest var, níu manns í gæslu­varð­haldi.

Í dag er Angjelin sá eini sem enn sætir gæslu­varð­haldi vegna málsins en gildandi gæslu­varð­halds­úr­skurður yfir honum rennur út 15. maí næst­komandi. Sjö sæta enn far­banni vegna málsins.

Segist hafa fengið alvarlegar hótanir

Angjelin er nú í lausa­gæslu í fangelsinu á Hólms­heiði, sem þýðir að hann sætir ekki lengur ein­angrun og getur átt sam­neyti við aðra fanga á gæslu­varð­halds­gangi.

Angjelin segir að eftir að hann losnaði úr ein­angrun og hafi farið að geta að fylgjast með fjöl­miðlum hafi hann orðið var við alls­konar sögu­sagnir og get­gátur um málið sem eigi ekki við rök að styðjast.

„Málið er til­komið af per­sónu­legum á­stæðum, sem varðar annars vegar mig sjálfan per­sónu­lega og hins vegar gengið sem hinn látni til­heyrði. Al­var­legar hótanir komu fram og at­burða­rás var farin af stað sem ég get ekki farið nánar út í að svo stöddu,“ segir Angjelin

Angjelin vill ekki ræða málið frekar en telur að það muni skýrast við þegar rann­sókn málsins og sönnunar­færslu fyrir dómi er lokið.

Óttuðust hefndaraðgerðir

Lög­reglan á höfuð­borgar­svæðinu boðaði til blaða­manna­fundar um rann­sókn málsins 26. mars síðast­liðinn. Auk al­mennra upp­lýsinga um fram­gang rann­sóknarinnar greindi lög­regla frá mögu­legri hættu á hefndar­að­gerðum vegna málsins.

„Rann­sókn beinist einnig að því hvort hópur manna ætli að ráðast gegn þeim sem liggja undir grun í málinu og fjöl­skyldum þeirra,“ sagði Margeir Sveins­son yfir­lög­reglu­þjónn á fundinum. Vegna upp­lýsinga um þetta og vit­neskju lög­reglu hafi verið farið að­gerðir á höfuð­borgar­svæðinu þann 18. mars með að­stoð sér­sveitarinnar. Tveir hafi verið hand­teknir í þeim að­gerðum. Sam­kvæmt heimildum Frétta­blaðsins var um að ræða við­skipta­fé­laga hins látna.

Á um­ræddum blaða­manna­fundi fór Margeir einnig al­mennt yfir rann­sókn málsins. Lög­reglu hafi borist til­kynning um slasaðan mann fyrir utan hús númer 28 í Rauða­gerði, rétt fyrir mið­nætti 13. febrúar síðast­liðins. Maðurinn hafi verið úr­skurðaður látinn eftir flutning á slysa­deild. Nokkur skot­för hafi mátt sjá á líki mannsins, sem lög­reglu hafi þótt benda til mann­dráps af á­setningi. Krufning hafi síðar leitt í ljós að Armando hafi verið skotinn níu skotum í búk og höfuð með 22 kali­bera skot­vopni.

Grunur vaknaði um uppgjör milli brotahópa

Við upp­haf rann­sóknar lög­reglu hefði vaknað grunur um að málið tengdist ein­hvers­konar upp­gjöri milli brota­hópa hér á landi, bæði er­lendum og ís­lenskum.

Tólf hafi verið hand­teknir vegna málsins á fyrstu stigum rann­sóknarinnar og tveir til við­bótar síðar eins og áður sagði.

Þá greindi Margeir frá því að játning væri komin fram frá manni af sama þjóð­erni og hinn látni, en þeir eru báðir af albönskum upp­runa.

Á fundinum kom fram að rann­sóknar­gögn lög­reglu styðji við játninguna en rann­sókn sé þó enn í fullum gangi. Hún varði meðal annars mögu­legan þátt annarra sak­borninga að skipu­lagi og þátt­töku fyrir og eftir mann­drápið.

Fjórtán sakborningar af ellefu þjóðernum

Fjór­tán manns hafa réttar­stöðu sak­bornings í málinu. Sak­borningarnir eru af ellefu þjóð­ernum og sagði Margeir ó­venju­legt af hve mörgum þjóð­ernum þeir eru sem taldir eru tengjast málinu. Um er að ræða fólk frá Ís­landi, Rúmeníu, Spáni, Ítalíu, Portúgal, Albaníu, Eist­landi Serbíu, Lett­landi, Hvíta-Rúss­landi og Litháen. Sam­vinna brota­hópa af svo mörgum þjóð­ernum sé ó­venju­leg, í saman­burði við hin Norður­löndin.

Þegar blaða­manna­fundurinn var haldinn, rúmum mánuði eftir morðið, höfðu sau­tján leitir verið fram­kvæmdar vegna rann­sóknar málsins, leitað hafi verið í húsum, í bílum og á víða­vangi. Um­ræddar leitir hafi ekki að­eins tengst meintu morð­vopni heldur miðað að því að afla sönnunar­gagna í málinu.

Meint morðvopn fannst í sjó

Lagt hafi verið hald á ýmsa muni, þar á meðal sím­tæki, tölvur, skot­vopn og skot­færi. Auk þess liggi fyrir fram­burður fjölda vitna og upp­lýsingar sem aflað hafi verið úr öryggis­mynda­vélum, sím­tækjum og tölvum.

Skot­vopnið sjálft fannst ekki fyrr en rúmum mánuði eftir að morðið var framið, í sjó í ná­grenni höfuð­borgar­svæðisins.

Að sögn Margeirs styður rann­sókn á skot­vopninu grun lög­reglu um að skotið hafi verið úr því í Rauða­gerði um­rædda nótt.

Ákæra enn ekki verið birt

Ákæra hefur enn ekki verið birt í málinu, en samkvæmt lögum um meðferð sakamála má ekki halda manni í gæsluvarðhaldi lengur en tólf vikur án þess að honum hafi verið birt ákæra. Þetta þýðir að hafi Angjelin ekki verið birt ákæra fyrir miðjan maí mánuð, þarf að sleppa honum úr haldi.

Hér má horfa á blaðamannafund lögreglu um málið, frá 26. mars síðastliðnum: