Andri Steinn Hilmarsson, varabæjarfulltrúi og starfsmaður þingflokks Sjálfstæðisflokksins, sækist eftir 2. til 3. sæti í prófkjöri Sjálfstæðisflokksins sem fer fram á morgun.

„Andri leggur áherslu á góða þjónustu við fjölskyldur í Kópavogi. Vill hraða uppbyggingu óbyggðra hverfa í bænum með áherslu á sérbýli. Hann vill lækka skatta á Kópavogsbúa og styður fjölbreytt rekstrarform í skólum bæjarins. Andri Steinn telur mikilvægt að styrkja almenningssamgöngur og vistvæna ferðamáta, enda séu umferðaræðar höfuðborgarsvæðisins þegar komnar að þolmörkum, en hafnar hugmyndafræði um að þrengja þurfi að almennri bílaumferð, sem sé fyrsti og vinsælasti valkostur Íslendinga,“ segir í tilkynningu um framboðið.

Þar kemur einnig fram að hann er formaður umhverfis- og samgöngunefndar Kópavogsbæjar, og hefur tekið virkan þátt í störfum flokksins í Kópavogi á undanförnum árum. Hann var hann kosningastjóri flokksins fyrir bæjarstjórnarkosningarnar 2018 og kosningastjóri Sjálfstæðisflokksins í Suðvesturkjördæmi 2016 og 2017. Þá hefur hann ritstýrt útgáfu Voga, blaði sem gefið er út af Sjálfstæðisflokknum, síðan 2019.