Tæpur helmingur þeirra sem taka afstöðu er hlynntur Borgarlínu, en þrír af hverjum tíu eru andvígir. Þetta sýna niðurstöður nýrrar könnunar sem Zenter rannsóknir gerðu fyrir Fréttablaðið.

„Í stuttu máli er ég bara mjög ánægður með þennan sterka stuðning. Þetta er mikilvægt veganesti inn í næsta tímabil Borgarlínunnar sem er framkvæmdatímabil,“ segir Dagur B. Eggertsson borgarstjóri um niðurstöðurnar.

Borgarlína.png

Stuðningur við Borgarlínu dregst aðeins saman frá því í október á síðasta ári þegar einnig var spurt um viðhorf til verkefnisins. Þá var rétt rúmur helmingur hlynntur Borgarlínu en um fjórðungur andvígur.

Konur eru hlynntari Borgarlínu en karlar og stuðningurinn er meiri meðal yngra fólks en eldra. Þá er mun meiri stuðningur hjá þeim sem hafa lokið háskólanámi en öðrum.

Íbúar á höfuðborgarsvæðinu eru einnig mun hlynntari Borgarlínu en íbúar á landsbyggðinni.

„Það kemur kannski ekki á óvart að stuðningurinn sé sterkastur þar sem framkvæmdirnar varða fólk mest og fyrstu áfangarnir eru,“ segir Dagur.

Ef horft er til einstakra sveitarfélaga á höfuðborgarsvæðinu reynist stuðningur við Borgarlínu mestur meðal Reykvíkinga. Rúm 57 prósent þeirra eru hlynnt Borgarlínu en tæp 29 prósent andvíg.

Næstmestur stuðningur er í Kópavogi en þar er rétt rúmur helmingur hlynntur en rúmur fimmtungur andvígur. Í Hafnarfirði er tæpur helmingur hlynntur og tæpur fjórðungur andvígur.

Í Mosfellsbæ eru skoðanir skiptari, en rúm 38 prósent þar eru hlynnt Borgarlínu og tæp 35 prósent andvíg. Tæpur þriðjungur Garðbæinga er hlynntur Borgarlínu en tæpur helmingur andvígur. Á Seltjarnarnesi eru 39 prósent hlynnt en 61 prósent andvígt.

Könnunin sem send var á könnunarhóp Zenter var framkvæmd 16. til 27. júlí. Í úrtaki voru 2.300 manns 18 ára og eldri en svarhlutfall var rúmt 61 prósent. Gögnin voru greind eftir kyni, aldri og búsetu.