Vestan og norðvestlæg átt í dag, 5 til 10 metrar á sekúndu. Dálítil súld vestanlands og við norðausturströndina fram eftir degi, en víða bjartviðri seinni partinn.

Hiti yfirleitt 10 til 18 stig, hlýjast á Suðausturlandi, en kólnar talsvert fyrir norðan og austan seinnipartinn í dag.

Fram kemur í hugleiðingum veðurfræðings hjá Veðurstofunni að á morgun gangi í norðaustan 8 til 13 metra á sekúndu með skúrum, jafnvel slydduéljum á norðaustanverðu landinu en þurrt að kalla á Vesturlandi.

Svöl norðanátt á föstudag með éljum norðaustan- og austanlands, en bjart með köflum sunnan heiða. Á laugardag gengur norðanáttin niður og léttir víða til.

Útlit er fyrir ört kólnandi veður á morgun með skúrum eða slydduéljum norðaustantil á landinu, og éljum á fjallvegum. Akstursskilyrði geta orðið varasöm, og eru vegfarendur hvattir til að sýna aðgát.

Veðurhorfur á landinu næstu daga

Á föstudag:

Norðan 8-13 m/s, en 13-18 austast. Dálítil él norðaustan- og austanlands, en bjart með köflum sunnan heiða. Hiti 0 til 10 stig, mildast syðst.

Á laugardag:

Minnkandi norðanátt, 5-10 m/s eftir hádegi. Víða bjart veður, en skýjað á norðaustanverðu landinu. Hiti 6 til 13 stig, en 1 til 6 á Norður- og Austurlandi.

Á sunnudag (sjómannadagurinn):

Hæg suðlæg átt og léttskýjað norðan- og austanlands, en dálítil rigning á Vesturlandi. Hiti 7 til 15 stig, hlýjast á austanverðu landinu.

Á mánudag:

Sunnanátt og súld eða rigning, en víða léttskýjað og hlýtt í veðri norðan- og austanlands.

Á þriðjudag:

Suðlæg átt og dálítil rigning eða skúrir, en úrkomulítið á Norðurlandi. Hiti breytist lítið.