Frá og með morgundeginum eru nemendur, kennarar og annað starfsfólk Háskóla Íslands hvattir til að nota andlitgrímur í byggingum skólans. Sérstaklega þegar ekki er hægt að koma við 1 metra fjarlægðarmörkum og þegar loftgæði eru lítil. Grímum verður dreift í byggingum skólans í byrjun vikunnar eða eins fljótt og unnt er. Þetta kom fram í orðsendingu Jón Atla Benediktssonar, rektor Háskóla Íslands til stúdenta og starfsfólks í dag.

Byggingar Háskóla Íslands standa nemendum allar opnar á morgun. Til að tryggja starf háskólans áfram er afar mikilvægt að huga að einstaklingsbundnum sóttvörnum, þvo hendur mjög vandlega og spritta og virða 1 metra regluna, segir rektor.  

Þá hvetur hann einnig kennara að auka enn frekar rafræna kennslu vegna tilmæla sóttvararyfirvalda. Áfram verði lögð áhersla á að nýnemar eigi kost á staðnámi þar sem það er mögulegt miðað við þær aðstæður sem nú séu uppi. 

Skimun verður áfram í boði Íslenskrar erfðagreiningar fyrir nemendur og starfsfólk háskólans.

„Ég vil hvetja þau ykkar sem ekki hafa nýtt þetta úrræði til að bóka tíma. Fylgjum reglum almannavarna án undantekninga kæru nemendur og samstarfsfólk. Verum undanbragðalaust heima ef minnstu einkenna er vart. Hlöðum niður smitrakningarappi landlæknis. Þessar aðgerðir eru til að bregðast við þeirri bylgju sem nú virðist í uppsiglingu. Stöndum áfram saman af þeirri einurð sem við höfum gert hingað til. Þannig tryggjum við starf okkar og sterkara samfélag." 

Í síðustu viku greindust a.m.k þrír starfsmenn Háskólans með Covid-19 og einhverjir nemendur þar að auki. Í kjölfarið var fólk sem starfaði í aðalbygingu Háskólans sett í sóttkví, þar á meðal rektor. Allt starfsfólk Hámu á Háskólatorgi var einnig sett í sóttkví og veitingastaðnum lokað tímabundið síðastliðinn þriðjudag.