„Við erum með á borði hjá okkur konu sem er til dæmis að kenna fimm daga námskeið og útskrifar fólk úr þeim skóla, fólk er að fara til hennar og borgar þrjú hundruð þúsund kall og hún gefur þeim stimpil um að þú sért bara menntaður nuddari og megir byrja að nudda,“ segir Regin Unason formaður Félags íslenskra heilsunuddara. Horfa má á viðtal við Regin um málið neðst í fréttinni.

Um umrædda konu sem heldur námskeiðin segir Regin: „Ég sjálfur sendi henni skilaboð bara fyrir forvitnissakir um hvaða grunnkunnáttu maður þyrfti að hafa til að fara á námskeið hjá henni og þá kom í ljós að það var engin.“

Regin ræddi þetta á Fréttavaktinni á Hringbraut í byrjun vikunnar og þar kom fram að hver sem er getur kallað sig nuddara og tekið fólk til meðferðar og kennt fólki nudd sem getur verið varasamt heilsu fólks og opnað leiðir fyrir ólöglegri starfsemi svo sem mansali og vændi.

Engin krafa

Engin krafa er gerð um þekkingu á mannslíkamanum til að kallast nuddari segir Regin. „Mér finnst það bara sláandi því að í okkar námi er gerð krafa á líffæra og lífeðlisfræði, vöðvafræði. Ekki bara þarf nuddarinn að vita hvað á að nudda heldur líka hvenær og hvað nuddum við ekki,“ segir Regin.

Aðspurður hvort það geti verið hættulegt heilsu fólks að fara til manneskju sem veit ekki nógu mikið segir Regin: „Já, það er hættulegt, ef þú ert með mein og þú ferð til einhverjar manneskju sem veit ekki nógu mikið og ferð að hamast í meininu, sama hvort það er tognun eða blæðing inn á vöðva, þá getur þú gert verra.

„Eina sem ég gat sagt var, þið verðið að fara til lögreglunnar“

„Hættulegast er það að ef þú ferð til manneskju sem veit ekki nógu mikið og veit ekki hvað hún er að gera að þá fer hún kannski að reyna eitthvað annað,“ segir Regin og á borð til félagsins hafi komið dæmi um úr íþróttunum.

„Meira að segja þjálfari í íþróttafélagi sem var að reyna að nudda mein úr iðkendum flokkast undir kynferðisofbeldi, segi ég.“

Regin segir það hættulegasta við að hver sem er geti kallað sig nuddara, án þess að hafa nokkra menntun, er að inn í starfið stígi einstaklingar sem brjóta á fólki markvisst.

Þekkt er úr fréttum að einstaklingar kalli sig nuddara og beiti svo fólk kynferðisofbeldi. „Núna bara um daginn kom upp mál hér á Akureyri sem var stelpa undir lögaldri sem lenti í nuddara og þau töluðu við okkur í félaginu, eða mig persónulega og því miður var eina sem ég gat sagt, þið verðið að fara til lögreglunnar og verðið að kæra þetta þar,“ segir Regin.

Það stoppar engan í því að fara að nudda

Umræddur nuddari er ekki í félaginu, segir hann. Það stoppar ekkert fólk í að nudda, það stoppar fólk ekkert í að meðhöndla.“

Hvort að hann verði var við mansal og vændisstarfsemi í nuddbrandanum segir Regin: „Ég hef ekkert fyrir mér um mansal á Íslandi en heyrum það frá Svíþjóð í norrænu samstarfi með fagfélögum landanna. Þar er þetta orðið vandamál."

Hægt er að horfa á þáttinn og viðtalið við Regin hér að neðan. Viðtalið hefst á 15:23: