Flugdeild Landhelgisgæslunnar sinnti 299 útköllum árið 2022 og hafa þau aldrei verið fleiri. Fyrra met var sett árið 2018, en þá annaðist Landhelgisgæslan 278 útköll með loftförum stofnunarinnar.
Þetta kemur fram í fréttatilkynningu frá Landhelgisgæslunni.
Af útköllunum var tæplega helmingur þeirra vegna sjúkraflutninga, eða 156 talsins, og 115 vegna leitar eða björgunar. Um þriðjungur útkallanna farin á sjó, sem er aukning frá fyrra ári.
Þá voru 136 útköll á hæsta forgangi, af þeim 299 útköllum sem bárust.
Sjúkraflutningum fjölgaði einnig á síðasta ári. Meðal annars var nokkuð um útköll til Vestmannaeyja og á sunnanverða Vestfirði, sem hefðbundið sjúkraflug gat ekki annast sökum veðurs eða slæms skyggnis.
