Aldís Mjöll Geirsdóttir, alþjóðafulltrúi Ungra Jafnaðarmanna, var í dag kjörinn forseti Norðurlandaráðs æskunnar fyrst allra íslenskra kvenna. Síðasti fulltrúinn sem gegndi stöðunni fyrir hönd Íslands var Andrés Jónsson og gegndi hann stöðunni árið 2005.

Árlegt þing UNR ( Ungdommens Nordiska råd) átti að fara fram í Reykjavík en vegna kórónaveirufaraldurs fór það fram í gegnum fjarfundarbúnað. UNR er samnorrænn vettvangur þar sem ungt fólk frá ungliðahreyfingum stjórnmálaflokka á Norðurlöndunum kemur saman og hefur áhrif á ákvarðanir Norðurlandaráðs, sameiginlegs vettvangs þingmanna á Norðurlöndunum.

Aldís sagði í ræðu sinni að nú verði að styrkja rödd UNR og nýta þennan mikilvæga vettvang til framdráttar.

„Við verðum að sjá til þess að ungt fólk sé ekki skilið útundan og að við höfum sterka rödd í öllum málum. Í miðjum heimsfaraldri og loftslagsvá verðum við að standa vörð um réttindi og hagsmuni ungs fólks og tryggja að þau gleymist ekki í aðgerðum ríkisstjórna okkar,“ sagði Aldís.

„Samstaða er því mikilvægari en nokkru sinni fyrr á þeim tímum sem við upplifum nú, til að takast á við þessar stærstu áskoranir okkar tíma. Saman getum við barist fyrir betri og réttlátari heim“