Miklar um­ræður sköpuðust í gær í hverfis­hóp Laugar­dalsins um fata­söfnunar­gáma Rauða krossins sem þar eru staddir en í­búar höfðu fyllt gám sem stað­settur er við Lauga­læk og þegar hann var orðinn fullur þá skildu þau pokana eftir fyrir utan gáminn. Ein­hverjir höfðu svo farið í pokana til að finna sér föt og skilið fötin eftir á víð og dreif.

„Við erum alltaf að reyna að gera allt sem við getum til þess að koma í veg fyrir að akkúrat þetta gerist,“ segir Bryn­hildur Bolla­dóttir, upp­lýsinga­full­trúi Rauða kross Ís­lands, í sam­tali við Frétta­blaðið.

Íbúi í hverfi viðraði þá hug­mynd að færa tæmingu gámsins á föstu­dag í stað fimmtu­dag en Bryn­hildur segir að þau vinni eftir á­kveðnu plani og ef tæmingar­dagurinn væri færður í Laugar­dal þá þýðir það ein­fald­lega að hann verði líka færður annars staðar og það myndi í raun ekki breyta miklu því gámarnir, sem eru 70 til 80 talsins alls, eru allir í svipaðri nýtingu.

„Þeir eru allir ó­trú­lega vel nýttir, en það eru á­lags­tími núna. Það meira álag á vorin og þegar það er þurrt því svo fáir nenna að labba út með pokana þegar það rigning og það getur verið erfitt að ráða við það þegar allir eru að gera það á sama tíma,“ segir Bryn­hildur en sem dæmi þá safnaðist þetta mikla magn í Laugar­dalnum yfir helgina en mikið blíð­viðri var og þurrt alla síðustu helgi.

„En okkur þykir þetta mjög leiðin­legt. Því það er mjög lík­legt að þetta nýtist okkur ekki þegar þetta fer svona og fötin blotna. Þá enda þau í urðun því þau eru líklega ónýt.“

Samvinnuverkefni með almenningi

Bryn­hildur segir að þetta sé, með al­menningi, sam­vinnu­verk­efni. Þau þurfi að standa sig í að tæma og þegar þau fái til­kynningu um fullan gám þá reyni þau að bregðast við því sem fyrst en að al­menningur þurfi að taka fötin aftur heim ef að hann er fullur, eða fara með þau annað.

„Ég veit að það er leiðin­legt en ef hann er fullur þá þarf fólk að taka pokann aftur með sér heim og koma aftur eða fara í næsta gám.“

Spurð hvort þau hafi hugsað sér að stækka gámana segir hún að það séu eins gámar um alla Evrópu sem fólk þekki en að á öllum endur­vinnslu­stöðvum Sorpu sé að finna stærri gáma sem er hægt að skila fötum líka í þegar það er opið þar.

„Það er nokkuð svona öruggt veð­mál að reyna við Sorpu því gámarnir eru svo stórir þar,“ segir Bryn­hildur og bætir við:

„Það er tak­markað fjár­magn og mann­afli en við vitum að við verðum að gera þetta vel svo að fólk vilji taka þátt í þessu með okkur.“

Hér að neðan er hægt að sjá frekar upplýsingar um fatasöfnunargáma Rauða krossins eins og staðsetningu þeirra.