Beiðni um aðstoð áhöfn þyrlu Landhelgisgæslunnar barst snemma í morgun vegna skipverja sem var veikur um borð í grænlensku línuskipi sem statt var á milli Grænlands og Íslands, 144 sjómílur vestur af Bjargtöngum.
Samkvæmt fréttatilkynningu frá Landhelgisgæslunni tók TF-GRO á loft frá Reykjavíkurflugvelli á sjöunda tímanum í morgun og eftur um tveggja tíma flug hófst áhöfnin handa við að hífa skipverjann um borð. Mikið myrkur var á svæðinu og lélegt skyggni eins og sjá má á meðfylgjandi myndskeiði sem Landhelgisgæslan tók.
Í því má sjá undirbúning sigmannsins um borð í þyrlunni og alveg þar til hann er kominn um borð í skipið. Þyrlan lenti á Reykjavíkurflugvelli um ellefu leitið í morgun og var skipverjinn fluttur þaðan með sjúkrabíl á Landspítalann.
