Agnes M. Sigurðardóttir, biskup Íslands, tilkynnti það að hún hyggi á starfslok í nýárspredikun sinni í Dómkirkjunni í morgun.
Hún mun þó gegna embætti sínu næstu átján mánuði en hún hyggur á að ljúka vísitasíu sinni um landið í Bolungarvík á sjómannadaginn árið 2024. Agnes mun þá einnig fagna sjötugs afmæli sínu það árið.
„Þegar ég lít yfir farin veg er ég afar stolt af því sem áunnist hefur. Ég vissi að oft yrði á brattann að sækja í þeirri umbótavinnu sem ég vildi leggjast í. Og oft hefur gefið á bátinn. En þá er gott að hafa styrkingarorð frelsarans í huga og hjarta sem hefur ávallt lægt öldurnar þegar við lærisveinarnir verðum hrædd, þreytt og mædd í bátnum,“ sagði hún í prédikun sinni.
Agnes sagði einnig að kirkjan gegni enn mikilvægi starfi í nútímanum.
„Við búum við gott velferðarkerfi hér á landi miðað við mörg önnur lönd þó alltaf megi gera betur. Fyrir nokkru var ég spurð að því hvort að þjóðkirkjan hefði hlutverki að gegna í nútímasamfélagi. Um það eru deildar meiningar sýnist mér þegar lesið er eða hlustað á hina ýmsa miðla sem nútíminn býður upp á. En fólkið í kirkjunni er þess fullvisst að hlutverk kirkjunnar er mikilvægt nú sem fyrr,“ sagði Agnes.
Agnes tók við embætti sínu árið 2021 og er hún fyrsti kvenbiskup Íslands. Hún sagði að þjóðkirkjudagar er nýr biskup verði kosinn verði haldnir á mörkum sumar og hausts árið 2024. Dagarnir munu enda með vígslu á nýjum biskupi Íslands.
