Aftöku Lisu Montgomery var frestað á síðustu stundu en til stóð að hún yrði tekin af lífi í dag. James Hanlon, dómari í Indiana, frestaði aftökunni en litlu mátti muna að Montgomery yrði fyrsta konan sem yrði tekin af lífi af bandaríska ríkinu í 68 ár.
Montgomery, sem er 52 ára gömul, var dæmd til dauða árið 2007 fyrir mannrán og morðið á hinni 23 ára gömlu Bobbie Jo Stinnett árið 2004 sem var komin átta mánuði á leið. Montgomery skar barnið úr kvið hennar og lét sem það væri sitt uns hún var handtekin degi síðar. Barnið lifði ódæðið af og var komið til föður síns.
Montgomery hefur setið í fangelsi í 16 ár en aftaka hennar átti að fara fram í kvöld.
Málsvörn lögfræðinga Montgomery var að hún hafi ekki verið meðvituð um gjörðir sínar vegna geðraskana. Kviðdómur féllst ekki á það og dæmdi hana til dauða, þar sem henni hafi verið ljóst hve alvarlegan glæp hún framdi. Verjendur Montgomery voru síðar gagnrýndir fyrir málsvörnina.
Hanlon dómari féllst á þessa málsvörn í nótt og frestaði aftökunni.
Ekki réttlátt að taka hana af lífi
Að mati lögmanna Montgomery kom alvarleiki geðraskana sem hrjáðu hana er morðið átti sér stað kom ekki að fullu fram við réttarhöldin, einungis við áfrýjun er Montgomery var komin með nýja verjendur. Þeir fullyrða að Montgomery hafi glímt við langvinnan heilakvilla vegna áverka sem hún hefur orðið fyrir um ævina. Verjendurnir hafa beðið yfirvöld um að dæma hana frekar til lífstíðarfangelsis en dauða.
Í úrskurði dómarans segir að þau gögn sem voru lögð fyrir dóminn benda til þess að andleg heilsa Montgomery sé það slæm að hún geri sér enga grein fyrir raunveruleikanum. Þar af leiðandi væri ekki réttlátt af ríkinu að taka hana af lífi.
Í fangelsi hefur Montgomery sagt frá ævi sinni fram að morðinu í samræðum við sérfræðinga. Hún fæddist með áfengisheilkenni, ólst upp við erfiðar aðstæður og var frá unga aldri beitt grófu líkamlegu og kynferðislegu ofbeldi. Hálfsystir hennar var fjarlægð af heimilinu af barnaverndaryfirvöldum en ekki Montgomery og ofbeldinu linnti ekki.
Þrátt fyrir að hún gerði viðvart um ofbeldið hlaut Montgomery aldrei neina aðstoð. Hún giftist stjúpbróður sínum 18 ára gömul sem beitti hana einnig miklu ofbeldi.
Tíu manns hafa verið teknir af lífi í Bandaríkjunum frá því að dómsmálaráðuneytið ákvað að hefja aftökur aftur eftir 16 ára hlé. Donald Trump varð þá fyrsti forsetinn í 130 ár til að heimila aftökur á stjórnarskiptatíma.
