Hersir Aron Ólafsson, aðstoðarmaður fjármálaráðherra segir það rangt að hann hafi gert kröfu um að Bjarni Benediktsson myndi mæta einn í viðtal í Kastljós í kvöld. Hann segir að flestir sem fylgist með fréttum sjái að Bjarni hefði þorað að mæta stjórnarandstöðunni og að hann verði með í sérstakri umræðu á Alþingi um skýrslu Ríkisendurskoðunar á morgun.

„Lík­lega er það heiður fyrir manninn bak við tjöldin að fá shou­tout í Kast­ljósinu, og það oftar en einu sinni. Til­efnið var hins vegar svo­lítið skrýtið í kvöld. Þátta­stjórnandinn Sig­ríður Dögg full­yrti þar að ég hefði sett skil­yrði um að Bjarni Bene­dikts­son yrði einn í við­tals­setti kvöldsins. Upp­leggið hefði upp­runa­lega verið að hann færi í við­tal með stjórnar­and­stæðingum, en ég síðan gert kröfu um annað. Þetta er rangt,“ segir Hersir.

Hersir segir að hann og Sig­ríður Dögg hafi verið í reglu­legum sam­skiptum í dag, frá því að Bjarni sam­þykkti beiðni hennar um að mæta í Kast­ljós.

„Síð­degis töluðum við saman um fyrir­komu­lag þáttarins, sem yrði þannig að Bjarni kæmi í settið til Sig­ríðar Daggar og svaraði spurningum hennar um skýrslu Ríkis­endur­skoðunar. Þá höfðum við þegar verið í nokkrum sam­skiptum, meðal annars í því skyni að ég reyndi að koma RÚV í sam­band við Banka­sýslu ríkisins – en hún vildi líka fá full­trúa hennar í þáttinn,“ segir Hersir.

Hersir segir að hann hafi fengið sím­tal frá Sig­ríði þegar nær dró þættinum um breytt fyrir­komu­lag, að Bjarni myndi mæta stjórnar­and­stæðing.

„Ég benti á að það væri annað en á­kveðið hefði verið skömmu áður og eðli­legt að fyrir­komu­lagið stæði ó­breytt. Það væri ekki sér­stakt hags­muna­mál fyrir okkur að mæta í þáttinn yfir höfuð. Við hefðum þegar verið í sjón­varps­við­tali við kvöld­fréttir RÚV, á­samt fjölda annarra miðla, og ættum auk þess boð í frétta­sett RÚV í beinni. Úr varð hins vegar að halda ó­breyttu fyrir­komu­lagi,“ segir Hersir.

Hann segir að næsta sem dúkkaði upp var færsla Krist­rúnar Frosta­dóttur um að Bjarni þorði ekki að mæta henni í Kast­ljósi.

„Flestir sem fylgjast með fréttum og þing­um­ræðum sjá ef­laust að Bjarni hefur „þorað“ að mæta stjórnar­and­stöðunni hvar sem þess þarf, hvort sem er í þing­sal, sjón­varps­sal eða sölum þing­nefnda. Mér skilst að hann ætli meira að segja að tala í sig kjark og vera með stjórnar­and­stöðunni í sér­stakri um­ræðu á Al­þingi um skýrslu Ríkis­endur­skoðunar allan daginn á morgun,“ segir Hersir.

Þóra Margrét Baldvinsdóttir, eiginkona Bjarna sagði í athugasemd undir færslunni að henni fannst áberandi hversu oft Sigríður greip fram í fyrir Bjarna, en ekki eins mikið fyrir öðrum viðmælendum þáttarins.

„Ekki að ég sé hlutlaus en mér fannst ég bara upplifa dónaskap af hálfu stjórnandans,“ sagði Þóra.