Það síðasta sem ég átti von á í lífinu var að flytja aftur hingað. Lífið kemur manni stöðugt á óvart,“ segir tónskáldið Atli Örvarsson sem flutti aftur til Akureyrar frá Los Angeles fyrir fimm árum ásamt eiginkonu sinni Önnu.

„Los Angeles er spennandi staður til að búa á þegar maður hugsar mest um sjálfan sig, en ekkert endilega þegar þú hefur fleiri til að hugsa um,“ segir Atli og nefnir sem dæmi margra klukkutíma akstur á milli staða í Bandaríkjunum. „Við ákváðum að fara eitthvert þar sem lífið er þveröfugt. Það tókst, því á háannatíma á Akureyri tekur ekki tíu mínútur að keyra niður í bæ.“

Starfsemi Atla fer enn að mestu leyti fram í Los Angeles þar sem fjölskyldan heldur enn í tengsl við vini og samstarfsaðila. „Þetta er frekar tvískipt líf og kannski er þessi gluggi, að geta áfram alltaf komist út í heim, ákveðin forsenda fyrir því að vera hér áfram.“

Líf í biðstöðu

„Þegar ég áttaði mig á að ég hafði búið hálfa ævina í Bandaríkjunum þá fattaði ég að nánast öll mín fullorðinsár hef ég búið í Ameríku sem hefur mótað mig einstakling,“ segir Atli. „Þegar maður flytur burt svona ungur og kemur til baka þá er ýmislegt sem þarf að skoða í fortíðinni og það líf sem maður kvaddi á sínum tíma. Það fór ekkert, það var bara að einhverju leyti í biðstöðu.“

Skömmu eftir að Atli flutti aftur til Íslands tók hann við hlutverki sem formaður Hljóðritasjóðs þar sem hann segist hafa kynnst íslensku tónlistarlífi upp á nýtt. „Þetta var eins og að fara á „speed date“ við íslensku tónlistarflóruna. Ég vissi að það var mikið gert af góðri tónlist hérna heima en mig óraði ekki fyrir að það væri svona mikið.“

Eftir að setu Atla í stjórn sjóðsins lauk fór hann í framhaldinu að hugsa um mögulegar leiðir til að nýta þær tengingar sem hann hafði myndað erlendis til að hjálpa íslenskum listamönnum að koma tónlist sinni á framfæri. Í kjölfarið stofnaði hann, ásamt Íranum Colm O´Herlihy, útgáfufyrirtækið og tónlistarforlagið INNI.

Atli segir eðli fyrirtækja í tónlistargeiranum hafa breyst mikið. „Landslagið er allt öðru vísi í dag sem er að hluta til út af stafrænni dreifingu á tónlist. Flest fyrirtækin eru núna í einhvers konar 360 gráðu hlutverkum þannig að það er minni aðskilnaður á milli útgefanda, forleggjara (music publisher), umboðsmanna o.s.frv. Hjá okkur er þetta meira og minna allt undir einum hatti og kannski mikilvægasta verkefnið að koma réttu tónlistinni og listamönnunum fyrir rétt augu og eyru.“

Einlægni að leiðarljósi

Fyrsta útgáfa INNI verður fyrsta sólóplata Atla sem er væntanleg í júlí. „Platan hefur lengi dvalið í mér en innblásturinn og ásetningurinn kom eftir að ég flutti heim,“ segir Atli og bætir við að eina leiðin til að gera svona verkefni sé að taka sér tíma. „Ef þú bíður eftir því að hafa tíma þá gerist ekkert. Þetta er ekki verkefni sem ég hef verið ráðinn í af öðrum til að sinna, ég hef eiginlega ráðið sjálfan mig til að sinna sjálfum mér.“

„Ef þú bíður eftir því að hafa tíma þá gerist ekkert. Þetta er ekki verkefni sem ég hef verið ráðinn í af öðrum til að sinna, ég hef eiginlega ráðið sjálfan mig til að sinna sjálfum mér.

Verkefnin sem Atli hefur sinnt fyrir sjónvarp og kvikmyndir hafa verið úrvals námskeið í stúdíóvinnu, en nú eru áherslurnar aðrar. „Galdurinn núna er að nálgast einhvers konar einlægni, hjarta og sál innra með sjálfum sér. Að gera eitthvað sem er beint frá innstu rótum þótt ég hafi auðvitað metnað fyrir því að þetta sé vel útfært.“

Ferlar og gerlar

Það eru þó fleiri járn í eldinum hjá Atla um þessar mundir, en hann sér um tónlistina fyrir væntanlega Eurovision mynd Netlflix, sem og tónlistina fyrir sjónvarpsþáttaröðina Finding Jacob sem er væntanleg á Apple TV. Atli segir aðdraganda slíkra verkefna geti verið misjafnan. „Ég segi stundum að ferill sé eins og gerill. Hann vindur statt og stöðugt upp á sig og ólíkir hlutar hans geta leitt til óvæntra verkefna.“

„Eurovision verkefnið kom til þegar David Dobkin leikstjóri tengdi við stef sem ég hafði gert fyrir myndina Edge of Seventeen fyrir nokkrum árum síðan. Ég fór svo á fund með honum og við náðum vel saman. Svo hjálpaði það til að ég er Íslendingur þar sem myndin var að talsverðum hluta tekin upp hér,“ segir Atli.

„Defending Jacob kom svo til þegar framleiðendurnir og leikstjórinn heyrðu efni af plötunni sem ég er að fara að gefa út. Það var eitthvað við þá tónlist sem þeim fannst vera rétti hljómurinn fyrir þáttinn, þótt það sé ekki tónlist sem gerð hafi verið fyrir kvikmynd eða þætti,“ segir Atli sem þekkir reyndar leikstjóra þáttanna, Morten Tildum, persónulega. „Synir okkar voru skólabræður í Los Angeles og ég þekkti hann sem fjölskylduvin löngu áður en ég fór að vinna með honum.“

Aðspurður segist Atli ekki hræddur um að vera „typecast-aður“ í að gera myndir sem innihalda nafnið „Jacob“, en hann gerði tónlistina fyrir endugerð myndarinnar Jacob‘s Ladder fyrir nokkrum árum. „Á sínum tíma hélt ég reyndar að ég yrði fastur í að sinna verkefnum sem innihéldu orðið „witch“, og hafði áhyggjur af að þeim álögum ætti ekkert að létta. En ég tek alveg sénsinn á þessu með Jacob,“ segir Atli og hlær, en hann gerði tónlistina fyrir myndirnar Season of the Witch og Hansel & Gretel: Witch Hunters.

Ekki bara heimavinna

Samvinna er lykilatriði þegar kemur að samstarfi milli tónskálds og leikstjóra að mati Atla. „Það sem maður vonast eftir er að þetta sé raunveruleg samvinna en ekki bara fyrir sett heimaverkefni sem maður á að skila fyrir einhvern frest. Ég hef fundið að eftir því sem menn hafa meiri trú á sínu eigin efni þeim mun opnari eru þeir fyrir að prófa eitthvað nýtt, og að leyfa tónlistinni að finna sína réttu rödd sem hæfir verkefninu.“

Atli segir spennandi að takast á við ólík verkefni. „Það er gaman að fara úr miklu drama yfir í að gera kómedíu, og ekki bara einhverja kómedíu heldur með Will Ferrell í fararbroddi. Það segir manni að maður sé ekkert endilega að festast í sama fari,“ segir hann og að auki sé gott að vinna að verkefnum fyrir aðra um leið og hann sé að finna sína eigin rödd. „Það getur lifað góðu lífi samhliða leitinni að sínum eigin kjarna, og er kannski bara hollt.“