Spírur eru upphaf lífs. Stútfullar af næringarefnum og góðar fyrir líkamann og þarmaflóruna. Katrín Halldóra Árnadóttir, hjá Ecospírum, ræktar spírur á Íslandi og segir hún að mataræði skipti miklu máli fyrir uppbyggingu og viðhald góðrar þarmaflóru.

„Annars vegar svokallað „probiotics“ fæði sem eru lifandi gerlar og finnast í jógúrti, súrkáli og gerjuðum mat og hins vegar „prebiotics“ fæði sem er einskonar áburður fyrir góðu bakteríuflóruna þannig að hún geti vaxið og dafnað,“ segir Katrín Halldóra. „Mikilvægt prebiotics fæði eru til að mynda ákveðnar tegundir trefja sem góðgerlarnir geta brotið niður og nýtt sér til vaxtar, einkum á bifidobaterium og lactobacillus góðgerlunum. Hér má nefna t.d. lauk, hvítlauk, aspas, og mungbaunir sem afbragsgott fæði fyrir góðgerlana.“

Katrín segir að ferskt, andoxunarríkt, auðmelt og bólgueyðandi fæði sem og fæði sem eykur niðurbrot og hreinsun meltingarvegarins mjög mikilvægt fyrir umhverfi góðgerlana.

„Hér erum við að tala um t.d. túrmerik, fenugreek, engifer, sítrusávexti og káltegundir af krossblómaætt eins og brokkóli. Brokkólí inniheldur mikið magn af glúkórafaníní. Þegar þess er neytt fersks brotnar það niður í sérvirka efnið sulforaphane sem heldur óvinveittum bakteríum í magaslímhúðinni í skefjum, samanber H. Pylori bakteríunni og hlutleysir sindurefni sem geta valdið skaða í meltingarveginum sem og annars staðar í líkamanum,“ segir Katrín.

Spírur eru mjög trefjaríkar, auðmeltar og ensímríkar og kjörin fæða fyrir meltingarveginn, þegar þeirra er neytt með bólgueyðandi og trefjaríkri fæðu fá góðgerlarnir það sem þeir þurfa til að vaxa og dafna. „Hér er uppskrift af góðum morgundrykk sem hressir og kætir þarmaflóruna.“

Þarmaflórubúst Ecospíru

2,5 dl ananas

1 lífræn epli kjarnhreinsuð 

½ stilkur sellerí

1  msk lífrænn lime eða sítrónusafi 

1/2  lítil lífræn túrmerik rót með hýðinu (litli fingur að stærð) eða ½ tsk lífrænt túrmerik duft

1/8 tsk pipar

1 msk rifið engifer

1  tsk hunang (gott hrátt hunang); hunang inniheldur fjöldan allan af góðum meltingargerlum

1 msk af chia geli eða hörfræjar geli útí (chia þarf 30 mín í vatni til að búa til gel, hörfræ 4-6 tíma)

2-3 stilkar aspas, skolaður vel og neðsti 1-2 cm skorinn af.  

25g brokkolíspírur

25g spíruð prótínblanda (mung-, linsur- og fenugreek spírur)

Setja allt í blandarann og bæta við vatni upp að 1 lítra á blandaranum.

Blanda í blandara og geyma rest í ísskáp , geymist í 2-3 daga.


Nánar um þarmaflóruna í Tilverunni, nýjum fréttakafla í Fréttablaðinu sem kemur út á hverjum fimmtudegi.