Ekki hafa greinst fleiri mislingasmit á Íslandi. Samtals eru 66 einstaklingar í heimasóttkví. Greint er frá þessu í tilkynningu sóttvarnalæknis á heimasíðu embættis landlæknis. 

Þar kemur einnig fram að á fundi sóttvarnalæknis sem haldin var í morgun með umdæmis- og svæðislæknum sóttvarna hafi komið fram að ekki hafa greinst ný tilfelli mislinga en nokkrir einstaklingar hafa að lokinni bólusetningu greinst með væg einkenni mislinga, sem orsakast af verkun bólusetningarinnar. Ef ekki greinast ný tilfelli mislinga hér á landi fyrir þann 26. mars, sem er þriðjudagur eftir viku, eru „yfirgnæfandi líkur á að mislingafaraldurinn hafi stöðvast.“

Samtals 66 einstaklingar eru í heimasóttkví á landinu, en eins og áður hefur komið fram er heildarfjöldi staðfestra tilfella fimm og eitt vafatilfelli. Segir í tilkynningu að hvert einstakt tilfelli hafi áhrif á marga aðila í nánasta umhverfi. Í heimasóttkví felst að þeir einstaklingar sem hafa komist í tæri við sýktan einstakling skulu halda sig heima frá degi sex eftir að þeir komust í tæri við hann og fram að 21 degi. 

Þá kemur fram í tilkynningu að dreifingu bóluefnis sé að ljúka um allt land. Finna má nánari upplýsingar um framkvæmt bólusetninga á heimasíðum heilsugæslustöðva. Framkvæmd bólusetninga hefur gengið vel á landinu og ekki komið upp nein vandamál við svo vitað sé. 

Tilkynningu landlæknis má lesa hér í heild sinni.