Deilan á milli Dan­merkur og Kanada, sem oftast er kölluð Viskístríðið, er loks lokið eftir 51 ár. Ríkin tvö deildu um það hvoru ríkinu Hans eyja í Norður-Ís­hafi til­heyrði. Ríkin komust saman að þeirri niður­stöðu að skipta ætti eyjunni upp. BBC greinir frá þessu.

Eyjan, sem er rétt rúmur einn fer­kíló­metri að stærð og er ó­byggð, hefur verið á­stæða deilunnar frá árinu 1971 og fékk nafn sitt „Viskístríðið“ vegna þess að aðilar á vegum beggja ríkjanna skiptust á því að fara til eyjunnar og skilja eftir viskí­flöskur til þess að lýsa því yfir að eyjan til­heyrði þeim.

Eyjan liggur 18 kíló­metra frá bæði Kanada og Græn­landi, því geta bæði ríkin [Kanda og Dan­mörk] lýst því yfir að eyjan til­heyri þeim sam­kvæmt al­þjóða­samningum.

„Stríðið“ hófst árið 1971 þegar löndin komu saman til að leysa landa­mæra­deilur í Naressundi, þar sem eyjan liggur. Tveimur árum síðar voru landa­mæri teiknuð í gegnum sundið en bæði ríkin vildu að eyjan til­heyrði þeim.

Það var því til þess að ríkin skiptust á því að flytja viskí­flöskur til eyjunnar. Árið 1984 skildu Kanada­menn eftir viskí­flösku sem bar mynd af hlyns­laufi, eins­konar þjóðar­merki Kanada.

Danir svöruðu þessu með því að sigla með snafs frá Kaup­manna­höfn til eyjunnar. Sú flaska bar danska fánann. Með flöskunni var skilinn eftir miði, á honum stóð „Vel­komin til danskrar eyju.“

Það var ekki fyrr en árið 2018 þegar ríkin stofnuðu til nefndar sem átti að leysa úr málunum. Niður­staða nefndarinnar, sem kynnt var í vikunni, var að skipta ætti eyjunni til helminga en skrifað verður undir samninginn þegar bæði þing ríkjanna hafa sam­þykkt samninginn.