Svandís Svavarsdóttir heilbrigðisráðherra hefur úthlutað rúmum 400 milljónum króna úr Framkvæmdasjóði aldraðra til uppbyggingar og endurbóta á hjúkrunarheimilum um land allt. Úthlutunin er í samræmi við tillögu stjórnar sjóðsins en þetta kemur fram í tilkynningu á vef Stjórnarráðsins.

Stærsta fjárhæðin rennur til Hrafnistu til viðbyggingar eldhúss og endurnýjun búnaðar þar, tæpar 180 milljónir. Þar verður framleiddur matur fyrir íbúa allra Hrafnistuheimilanna. Þá renna framlög til endurnýjunar búnaðar í eldhúsum Eirar og hjá Öldrunarheimilum Akureyrar. Samanlagt eru þetta tæpar 200 milljónir.

Þá fara tæpar 70 milljónir króna í framkvæmdir sem snúa að því að færa aðbúnað íbúa á hjúkrunarheimilum í nútímalegt horf, til dæmis með breytingu á fjölbýlum í einbýli með snyrtingu. 50 milljónum er þá varið í fjölgun dagdvalarrýma og bætta stöðu á Sólvangi í Hafnarfirði og vegna breytinga á hjúkrunardeild í dagdeild fyrir heilabilaða á Hrafnistu.

„Það er kraftur í uppbyggingu þessarar mikilvægu þjónustu við aldraða. Miklar endurbætur hafa átt sér stað á síðustu misserum sem bæta aðbúnað og aðstæður fólks sem ekki er fært um að búa lengur heima, samhliða nýframkvæmdum,“ segir ráðherrann í tilkynningunni.

„Þá er ekki síður mikilvæg sú uppbygging sem felst í fjölgun dagdvalarrýma, því í þeim felst þjónusta sem tvímælalaust lengir möguleika aldraðra til að búa heima þótt þeir þurfi mikinn stuðning og það er jú það sem flestir vilja allra helst.“