Alls voru staðfest 30 kór­ónu­veiru­smit inn­an­lands í gær. 60% þeirra sem greind­ust í gær voru í sótt­kví en 12 ein­stak­ling­ar voru utan sótt­kví­ar. 1.844 sýni voru tekin í gær.

18 einstaklingar eru nú inniliggjandi á sjúkrahúsi vegna Covid-19, þar af eru 3 á gjörgæslu. Tveir þeirra eru í öndunarvél. Í gær var 21 á sjúkrahúsi vegna veirunnar.

Nú eru 1.110 í ein­angr­un á Íslandi en þeim hef­ur fækkað und­an­farna daga. Í gær voru 1.159 í ein­angr­un

Alls eru 2.452 í sótt­kví, það er fækkun á milli daga en í gær voru 2.542 í sótt­kví. 1.442 eru í skimun­ar­sótt­kví.

Nýgengni innanlandssmita á hverja 100 þúsund íbúa síðustu tvær vik­urn­ar mælist nú 230,7og er á hraðri niður­leið. Við landa­mær­in eru þau 22,4.

Eitt virk smit greind­ist við landa­mær­in og fimm sýni eru í bið eft­ir niður­stöðu mót­efna­mæl­ing­ar.

Kúrvan á niðurleið

Þórólfur Guðnason, sóttvarnalæknir sagði á upplýsingafundi almannavarna í gær að faraldurinn væri á niðurleið innanlands. Hinsvegar væri faraldurinn í miklum vexti í Evrópu en Ísland er eitt fjögurra landa í Evrópu þar sem tíðni daglegra smita og meðaltal síðustu sjö daga fer minnkandi, allsstaðar annars staðar í álfunni er faraldurinn á uppleið.

Undanfarið hafa óvenjumargir farþegar greinst með Covid-19 á landamærunum. Þórólfur sagði að það gæfi til kynna að hlutfall einstaklinga með Covid-19 sem eru að koma hingað frá öðrum löndum eigi eftir að hækka þar sem faraldurinn er í mikilli uppsveiflu í flestum löndum.