Ekki hafa verið færri leitarbeiðnir að börnum hjá lögreglunni að höfuðborgarsvæðin frá því 2015. Alls voru 158 leitarbeiðnir í fyrra en árið á undan, 2020, voru þær 208. Það er því umtalsverð fækkun. Fjallað er um málið í Morgunblaðinu í dag og rætt við Guðmund Fylkisson, lögreglumann, sem hefur sinnt þessu verkefni frá því árið 2015.
Fram kemur í frétt Morgunblaðsins að alls voru leitarbeiðnirnar í 93 skipti vegna stúlkna og 65 vegna drengja. Að baki beiðnanna voru þó 52 börn, 25 stúlkur og 27 piltar sem voru fædd á bilinu 2003 til 2009.
Guðmundur sagði í viðtali við Fréttablaðið á síðasta ári að ekki eigi öll börnin við fíknivanda að stríða heldur eigi þau sum við hegðunarvanda að stríða eða að þau glími við andleg veikindi.
„Ef þetta er að breytast og þeim sem glíma við andleg vandamál er að fjölga, þá getur það orðið vandamál því það getur verið erfiðara að eiga við það en börn með fíknivanda. Þetta er ekki alveg klippt og skorið en ég hef ekki stórar áhyggjur af fjölda leitarbeiðna,“ sagði hann þá.
