Aðgerðarstjórn á Ísafirði er enn að störfum eftir að hún var virkjuð klukkan 23:44 í gærkvöldi vegna snjóflóða á Flateyri og í Súgandafirði. Almannavarnadeild Ríkislögreglustjóra sendi frá sér stöðuskýrsli rétt fyrir klukkan sex í kvöld en næsta stöðuskýrsla kemur á morgun.

Lýst var yfir neyðarstigi í dag vegna snjóflóðanna en eins og Fréttablaðið hefur greint frá féllu þrjú snjóflóð á skömmum tíma á tólfta tímanum í gær á norðanverðum Vestfjörðum.

Unnið er að því að koma fleiri björgunarmönnum vestur til þess að styðja við viðbragðið á svæðinu í komandi verkefnum. Björgunarsveitin á Flateyri er stödd í bænum auk 12-15 björgunarsveitarmanna sem komu með varðskipinu Þór í morgun.

Dróni notaður til að meta umfang flóðanna

Björgunarsveitafólk hefur unnið að því að kanna aðstæður á Suðureyri og umfang afleiðinga flóðbylgjunnar. Dróni var notaður til að kanna aðstæður á norðurhlíðum Súgandafjarðar til að gefa gleggri mynd af líkum á frekari flóðum.

Þrír fulltrúar eru í Samhæfingarstöð. Fullrúi RKÍ á Ísafirði er í aðgerðastjórn. Fjöldahjálparstöð hefur verið opnuð í Kiwanishúsinu á Ísafirði vegna rýminga og dvelja þar um 35 manns. Fjöldahjálparstöð var einnig opnuð í Fisherman-húsinu á Suðureyri og dvelja þar um 9 manns. Fjöldahjálparstöð var opnuð á Flateyri kl. 15 í dag.

100 kíló af matvælum flutt með þyrlu til Flateyrar

Þyrlusveit Landhelgisgæslunnar var kölluð út í dag og hefur verið að sinna sjúkraflutningi af Flateyri á Ísafjörð og frá Ísafirði til Reykjavíkur. Verið að kanna með möguleika á að flytja björgunarmenn og áfallateymi með þyrlu vestur seinna í kvöld.

Þyrla Landhelgisgæslunnar hefur einnig flutt vistir og annan búnað með þyrlu vestur. Þyrlan flaug fyrst með rafhlöður á Suðureyri auk þess sem hún náði í 100 kíló af matvælum fyrir Flateyri.

Varðskipið Þór flutti 24 björgunarsveitarmenn, tvo lögreglumenn og sjúkraflutningamann, auk læknis frá Ísafirði til Flateyrar í dag. Varðskipið verður áfram staðsett á Flateyri að öllu óbreyttu.

Vegagerðin

Opnað hefur verið fyrir umferð við Eyrarhlíð, Skutulsfjarðarbraut og Súðavíkur og Kirkjubólshlíðar en beðið er með að skoða Flateyrarveg.

Hvatt er til þess að fylgst sé með færð á vegum á vefsíðu Vegagerðarinnar, á Twitter eða með því að hringja í upplýsingasímann 1777.

Veðurspá næsta sólarhringinn

Óvissustig er í gildi vegna snjóflóðahættu á norðanverðum Vestfjörðum og er hættustig vegna snjóflóða í gildi á Ísafirði.

Norðaustan vindur fór upp í 10-18 m/s klukkan 15 og er enn í kringum 15-20 m/s úti fyrir Vestfirði og allt að 23 m/s í vindstrengjum við Snæfjallaströnd.

Í kvöld mun draga hægt úr vindi. Klukkan 21 verður síðan orðin norðaustan 8-15 m/s, og 5-13 m/s um miðnætti. Snjókoma í fyrstu en svo dregur hægt úr ofankomu, verður orðið úrkomulítið seint í kvöld og styttir upp seint í nótt. Austlæg átt er 5-13 m/s á morgun og él sunnantil, annars þurrt. Hiti nálægt frostmarki.

Rýmingar

Ákveðið hefur verið að rýma fjögur hús í Seljalandshverfi á Ísafirði eftir ráðleggingum frá snjóflóðavakt Veðurstofunnar. Húsin sem rýmd hafa verið eru undir varnargarði á Seljalandsmúla og eru næst garðinum. Hættumat gerir ráð fyrir því að ef mjög stórt snjóflóð fellur á garðinn geti gefið yfir hann og valdið tjóni. Fólk hefur einnig verið beðið um að yfirgefa nokkur hús í dreifbýli á N-Vestfjörðum.

Eignatjón og mengunarhætta

Reynt er að meta eignatjón eins og hægt er en það hefur gengið erfiðlega vegna veðurs. Náttúruhamfaratrygging Íslands hefur verið upplýst. Hafnarstjórn vinnur að því að meta mengunarhættu í samvinnu við Umhverfisstofnun, Landhelgisgæslu og aðgerðastjórn.